पछिल्लो समयका चर्चित 'कन्टेन्ट क्रिएटर' कुल ब्वायले 'होस्टेल ३' बाट फिल्म अभिनयमा डेब्यु गर्ने भएका छन्। निर्माताले शुक्रबार सामाजिक सञ्जालका यी सेलिब्रेटीलाई लिएर फिल्म बनाउने जनाएका छन्।

यसअघि यो फिल्मको अघिल्ला भागबाट अनमोल केसी, नाजिर हुसेन, स्वस्तिमा खड्का, सलोन बस्नेत, सुशील सिटौला, सुशील श्रेष्ठ लगायतले फिल्ममा डेब्यु गरिसकेका छन्। यो सूचीमा कुल ब्वाय पनि जोडिएका हुन्। वास्तविक नाम पारस बम भएका उनलाई फिल्मको शीर्ष कलाकारको रुपमा चिनाइएको छ।

उनी टिकटक, युट्युब र फेसबुक-इन्स्टाग्राम रिल्स लगायतका सामाजिक सञ्जाल प्लाटफर्ममा चर्चित छन्। विशेषगरी टिकटकले उनलाई नेपाली नेटिजन्समाझ चर्चा दिलाएको छ। निर्देशक सशान कँडेलले टिकटकर हुँदै इन्टरनेटमा कन्टेन्ट क्रिएटरको रुपमा चर्चित कुल ब्वायले फिल्ममा प्रमुख पात्रको भूमिका निर्वाह गर्ने बताए।

होस्टेलमा बसेर अध्ययन गरिरहेका किशोर र उनीहरूको भविष्यका घटनामा आधारित फिल्म निर्माण हुन लागेको छ। कुल ब्वाय गायक समेत हुन्। उनका 'कान्छी कता हिंडेको', 'बुवाको नाक होस्' लगायत गीत चर्चामा छन्।

फिल्मको कथाले माग गरेअनुसार नै उनलाई कास्ट गरिएको निर्देशक कँडेलले बताए। अघिल्ला भागजस्तै तेस्रो श्रृंखलाबाट समेत अन्य केही चलेका स्टारको जन्म हुने उनको भनाइ छ। फिल्मको पटकथा माधव शर्माले लेखिरहेका छन्।

यसअघि बनेका 'होस्टेल' र 'होस्टेल रिटर्न्स'लाई सुनिल रावलले बनाएका थिए। 'होस्टेल ३' लाई भने सम्मान इन्टरटेनमेन्टले आरोन कन फिल्म्ससँगको सहकार्यमा बनाउँदै छ। यसको निर्मातामा शिशिर ज्ञवाली, कार्यकारी निर्माता शंकर कोइराला, सहनिर्माताहरू सुधा मरहट्ठा, सुरेश कँडेल र अर्जुन सापकोटा छन्।